وزیرِ اعلیٰ سندھ مراد علی شاہ کا کہنا ہے کہ صوبے کے سیلاب زدہ علاقوں سے پانی نکالنے میں تین سے چھ ماہ لگ سکتے ہیں۔

کراچی میں صحافیوں سے گفتگو کرتے ہوئے مراد علی شاہ کا کہنا تھا کہ سندھ میں کسانوں کو تقریباً تین ارب 50 کروڑ کا نقصان ہوا ہے جب کہ ان کے بقول سیلاب سے لائیو اسٹاک کا اربوں روپے کا نقصان ہواہے۔

مراد علی شاہ کا کہنا تھا کہ مون سون بارش اور اس کے نتیجے میں آنے والے سیلاب سے رواں سال 14 جون سے نو ستمبر کے درمیان ملک بھر میں ایک ہزار 396 افراد ہلاک اور 12 ہزار 728 زخمی ہوئے جب کہ 3 کروڑ سے زیادہ افراد بے گھر ہوئے۔

ان کا مزید کہنا تھا کہ ماحولیاتی تبدیلیوں سے نمٹنے کے لیے پوری دنیا کو ایک ہونا ہو گا۔

سیلاب متاثرین کی امداد کے لیے آسٹریلوی کرکٹ بورڈ کی اپیل

کرکٹ آسٹریلیا نے پاکستان میں سیلاب سے متاثرہ افراد کی امداد کے لیے عطیات کی اپیل کی ہے۔

پیر کو ایک ٹویٹ میں کرکٹ آسٹریلیا نے کہا کہ پاکستان میں حالیہ بارشوں کے بعد پیدا ہونے والی سیلاب کی صورتِ حال کے نتیجے میں تین کروڑ سے زائد افراد متاثر ہوئے ہیں۔

کرکٹ آسٹریلیا نے ایک لنک بھی شیئر کیا ہے جس میں لوگوں سے عطیات جمع کرانے کی اپیل کی ہے۔

کراچی میں تین روز شدید گرمی کے بعد موسلا دھار بارش

پاکستان کے سب سے بڑے شہر کراچی میں تین روز کی شدید گرمی کے بعد پیر کو موسلا دھار بارش ہوئی ہے جس کے بعد موسم خوش گوار ہو گیا ہے۔

گزشتہ تین روز سے کراچی میں درجہ حرارت لگ بھگ40 ڈگری سینٹی گریڈ اور حبس کا عالم تھا۔ تاہم پیر کو دن میں بارش کے بعد موسم خوش گوار ہو گیا ہے۔

محکمۂ موسمیات کا کہنا ہے کہ صوبۂ سندھ کے بیشتر علاقوں میں آئندہ 48 گھنٹے کے دوران موسم گرم اور مرطوب رہنے کا امکان ہے تاہم کراچی، حیدر آباد، سکھر اور میرپور خاص ڈویژن میں کہیں کہیں مزید بارش کا امکان موجود ہے۔

امریکہ کے دو فوجی جہاز کئی ٹن امدادی سامان لے کر پاکستان کے صوبہ سندھ میں پہنچ گئے ہیں تاکہ متاثرین سیلاب کی مدد کی جا سکے۔ سندھ حالیہ مون سون بارشوں کے بعد ہلاکت خیز سیلاب سے سب سے زیادہ متاثر ہونے والے علاقوں میں شامل ہے۔

پاکستان میں سول ایوی ایشن اتھارٹی کے ترجمان سیف اللہ نے بتایا ہے کہ امریکہ کی طرف سے آنے والے ہر جہاز میں تقریباً 35 ٹن امدادی سامان موجود تھا جو اس صوبے میں عالمی ادارہ خوراک کے ذریعے تقسیم کیا جائے گا۔ امدادی سامان لے کر پاکستان پہنچنے والے جہاز سکھر ائر پورٹ اترے اور ترجمان کے مطابق امریکہ کی جانب سے جو امدادی آپریشن گزشتہ جمعرات کو شروع ہوا وہ 16 ستمبر تک جاری رہے گا۔

ماہرین پاکستان میں حالیہ غیر معمولی بارشوں اور سیلاب کی وجہ ماحولیاتی تبدیلیوں کو قرار دیتے ہیں۔ اقوام متحدہ کے سیکریٹری جنرل انٹونیو گوتریس نے بھی گزشتہ ہفتے پاکستان کے دورے کے دوران دنیا کے ممالک پر زور دیا تھا کہ وہ ماحولیاتی خطرات سے غفلت نہ برتیں۔ انہوں نے عالمی برادری سے کہا تھا کہ وہ پاکستان کو بڑے پیمانے پر امداد فراہم کرے۔

سول ایوی ایشن کے ترجمان سیف اللہ نے بتایا ہے کہ متحدہ عرب امارات سے بھی دو جہاز امدادی سامان لے کر کراچی پہنچ گئے ہیں۔ حکام نے بتایا ہے کہ اقوام متحدہ کے اداروں اور دیگر کئی ممالک نے پاکستان میں سیلاب متاثرین کے لیے امدادی سامان بھجوایا ہے لیکن متحدہ عرب امارات نے سب سے زیادہ امداد فراہم کی ہے۔