بارش جاری رہی تو ڈیمز کے اسپل ویز کھولنا پڑیں گے: مشیر داخلہ بلوچستان
مشیر داخلہ بلوچستان میر ضیاء اللہ لانگو نے خبردار کیا ہے کہ اگر کوئٹہ میں اسی طرح بارش کا سلسلہ جاری رہا تو ڈیم سے پانی کے اخراج کا عمل شروع کر دیا جائے گا۔
ضیاء اللہ لانگو نے قدرتی آفات سے نمٹنے کے ادارے پی ڈی ایم اے کے ڈائریکٹر جنرل نصیر ناصر کے ہمراہ سیلابی پانی سے متاثرہ علاقوں کا دورہ کیا۔
اس موقع پر ان کا کہنا تھا کہ اس وقت کوئٹہ میں شدید بارش کے باعث سیلابی صورتِ حال کا سامنا ہے اگر یہی صورتِ حال رہی تو ڈیمز سے پانی کا اخراج کیا جائے گا۔
مشیر داخلہ کے بقول پی ڈی ایم اے کا تمام عملہ، افسران اور مشینری سیلاب سے متاثرہ علاقوں میں موجود ہے۔
ڈیرہ اسماعیل خان کے کئی علاقوں میں سیلابی ریلا داخل
خیبر پختونخوا کے شہر ڈیرہ اسماعیل خان کے علاقے وانڈہ بلوچ کی آس پاس کی آبادیوں میں سیلابی ریلا داخل ہو گیا ہے جس کی وجہ سے مکینوں نے محفوظ مقام کی جانب نقل مکانی شروع کر دی ہے۔
سیلابی ریلا رتہ کلاچی اسٹیڈیم سے کچھ ہی دوری پر بہہ رہا ہے جہاں سیلاب متاثرین کے لیے کیمپ بھی بنایا گیا ہے اور وہاں لوگوں کی بڑی تعداد موجود ہے۔
وزیرِ اعلی خیبرپختونخوا محمود خان آج ڈیرہ اسماعیل خان کا دورہ کریں گے جس دوران وہ سیلابی صورتِ حال اور متاثرہ علاقوں کا جائزہ لیں گے۔
۔
نوشہرہ میں تعلیمی ادارے بند رکھنے کا فیصلہ
خیبر پختونخوا کے ضلع نوشہرہ میں تمام سرکاری و نجی اسکولز دو روز کے لیے بند کر دیے گئے ہیں۔
سرکاری اعلامیے میں کہا گیا ہے کہ ممکنہ سیلابی صورتِ حال کے پیشِ نظر ضلع بھر کے تعلیمی ادارے جمعہ اور ہفتے کو بند رہیں گے۔
حکام کے مطابق اسکولوں کی بندش کا فیصلہ سیلاب متاثرین کے لیے محفوظ مقامات کے بندوبست کے سلسلے میں کیا ہے۔
وزیرِ اعظم آج سکھر کو دورہ کریں گے
وزیرِ اعظم شہباز شریف صوبہ سندھ کے شہر سکھر، روہڑی، خیرپور، فیض گنج، کوٹ ڈجی اور ٹھری میر واہ کے سیلاب زدہ علاقوں کا فضائی دورہ کریں گے۔
سکھر شہر کی ضلعی انتظامیہ اور پی ٹی ایم اے کے نمائندے وزیرِ اعظم کو سیلاب متاثرین کی مدد اور تباہ شدہ انفرااسٹرکچر کی بحالی کے لیے جاری کاموں پر بریفنگ دیں گے۔
وزیر اعظم امدادی کاموں کا جائزہ لینے اور سیلاب متاثرین کا احوال جاننے کے لیے ان سے ملاقات بھی کریں گے۔
چیف سیکرٹری سندھ اور سکھر بیراج کے چیف انجنئیر وزیرِ اعظم شہباز شریف کو سیلاب کی تباہ کاریوں پر تفصیلاً بریفنگ دیں گے۔