شیخ حسینہ استعفے کے بعد بھارت میں موجود؛ ڈھاکہ میں صورتِ حال بدستورہ کشیدہ

بنگلہ دیش کے آرمی چیف وقار الزمان نے کہا کہ ملک میں ایمرجنسی یا کرفیو کی کوئی ضرورت نہیں ہے۔

انہوں نے کہا کہ وہ عبوری حکومت کے قیام کے لیے صدر سے ملاقات کریں گے۔

آرمی چیف نے طلبہ سے اپیل کی ہے کہ وہ پر امن رہیں۔ ہم ملک کے مسائل کا حل تلاش کرنے کی کوشش کررہے ہیں۔

ان کا کہنا تھا کہ عبوری حکومت کے قیام کے لیے صدر سے بات چیت میں تمام مرکزی سیاسی جماعتوں کے نمائندے شامل ہوں گے۔

بنگلہ دیش کے آرمی چیف کا مزید کہنا تھا کہ ملک مزید بد امنی کا متحمل نہیں ہو سکتا۔ معیشت کو پہلے ہی نقصان پہنچ رہا ہے جب کہ بہت سے لوگ مارے جا چکے ہیں۔ اب تشدد کا راستہ روکنے کا وقت ہے۔

اُن کا کہنا تھا کہ پرتشدد مظاہروں کے دوران جتنے لوگ بھی مارے گئے ہیں، اس معاملے کی پوری تحقیقات کی جائیں گی اور انصاف فراہم کیا جائے گا۔

بھارتی ذرائع ابلاغ نے دعویٰ کیا ہے کہ بنگلہ دیش کی مستعفی وزیرِ اعظم شیخ حسینہ بھارت کی شمال مشرقی ریاست تری پورہ کے دارالحکومت اگرتلہ پہنچ گئی ہیں۔

بھارت کے ٹی وی چینل 'سی این این-نیوز 18' نے دعویٰ کیا ہے کہ بھارت کی حکومت نے شیخ حسینہ کو 'سیف پیسج' (محفوظ راستہ) دینے کی پیشکش کی تھی۔

شیخ حسینہ پیر کو مظاہروں میں شدت آنے کے بعد ایک فوجی ہیلی کاپٹر کے ذریعے وزیرِ اعظم ہاؤس سے روانہ ہوئی تھیں۔ بعد ازاں بنگلہ دیش کے آرمی چیف جنرل وقار الزمان نے ایک پریس کانفرنس میں اعلان کیا تھا کہ وزیرِ اعظم مستعفی ہو گئی ہیں۔

وزیرِ اعظم شیخ حسینہ کے مستعفی ہونے کے بعد بنگلہ دیش میں براڈبینڈ انٹرنیٹ سروس بحال ہونا شروع ہو گئی ہے البتہ سوشل میڈیا پلیٹ فارمز تک رسائی تاحال بند ہے۔

بنگلہ دیش کے اخبار 'دی اسٹار' کے مطابق حکومت نے پیر کی صبح مظاہروں میں شدت آنے کے بعد براڈبینڈ انٹرنیٹ سروس بھی بند کرنے کا حکم دیا تھا۔

اخبار کے مطابق ملک میں 4جی موبائل انٹرنیٹ سروس بھی بحال ہونا شروع ہو گئی ہے جسے حکومت نے اتوار کو ملک بھر میں پرتشدد مظاہروں اور ہنگامہ آرائی کے بعد بند کر دیا تھا۔

بنگلہ دیش میں اتوار کو ہونے والی ہنگامہ آرائی اور پرتشدد مظاہروں میں کم از کم 90 افراد مارے گئے تھے جس کے بعد کوٹہ سسٹم کے خلاف جاری احتجاج میں دو ہفتوں کے دوران ہونے والی ہلاکتوں کی تعداد 300 تک جا پہنچی تھی۔

بنگلہ دیش میں آنے والی سیاسی تبدیلیوں کے بعد بھارت نے بنگلہ دیش کے ساتھ اپنی سرحد پر سیکیورٹی کو ہائی الرٹ کر دیا ہے۔

بھارتی ذرائع ابلاغ میں آنے والی خبروں کے مطابق بھارت کی بارڈر سیکیورٹی فورس کے ڈائریکٹر جنرل کلکتہ پہنچے ہیں جہاں سے امکان ہے کہ وہ بنگلہ دیش کے ساتھ سرحدی چوکیوں کا دورہ کریں گے۔

واضح رہے کہ دونوں ملکوں کے درمیان سرحد چار ہزار کلومیٹر سے زیادہ طویل ہے۔