شیخ حسینہ استعفے کے بعد بھارت میں موجود؛ ڈھاکہ میں صورتِ حال بدستورہ کشیدہ

پرتشدد مظاہروں اور فوجی مداخلت کے بعد مستعفی ہونے والی شیخ حسینہ واجد نئی دہلی پہنچ گئی ہیں۔

بھارتی میڈیا کے مطابق شیخ حسینہ واجد کا طیارہ پیر کی شام نئی دہلی کے قریب نئی دہلی کے قریب ہندن ایئر بیس پر لینڈ ہوا۔

بھارتی نشریاتی ادارے 'انڈیا ٹوڈے' کے مطابق امکان ہے کہ شیخ حسینہ دہلی سے لندن روانہ ہو جائیں گی۔

بنگلہ دیش کی وزیرِ اعظم شیخ حسینہ کے مستعفی ہونے کے بعد بھی ہزاروں مظاہرین دارالحکومت ڈھاکہ کی سڑکوں پر موجود ہیں جو میڈیا اطلاعات کے مطابق عوامی لیگ کی حکومت کے خاتمے کا جشن منا رہے ہیں۔

بنگلہ دیش کے اخبار 'ڈھاکہ ٹربیون' کے مطابق مظاہرین کے ایک گروہ نے دھان منڈی کے علاقے میں واقع بنگلہ دیش کے بانی شیخ مجیب الرحمان کے یادگاری میوزیم کو آگ لگا دی ہے۔

اخبار کے مطابق مظاہرین کے ایک اور ہجوم نے ڈھاکہ میں واقع عوامی لیگ کے ضلعی دفتر اور ایک اور پارٹی دفتر کو بھی نذرِ آتش کر دیا ہے۔

بنگلہ دیشی میڈیا پر چلنے والی کئی ویڈیوز میں مظاہرین کو شیخ مجیب الرحمان کی تصاویر اور مجسموں کو توڑتے اور نقصان پہنچاتے بھی دیکھا جا سکتا ہے۔

شیخ مجیب مستعفی وزیرِ اعظم شیخ حسینہ کے والد ہیں جنہیں 1971 میں پاکستان کے خلاف چلنے والی بنگلہ دیش کی تحریکِ آزادی کا قائد مانا جاتا ہے۔

بنگلہ دیش میں وزیرِ اعظم شیخ حسینہ کے استعفے اور آرمی چیف کی جانب سے عبوری حکومت بنانے کے اعلان کے بعد ملک کا سب سے بڑا ہوائی اڈہ پروازوں کے لیے بند کر دیا گیا ہے۔

بنگلہ دیش کے خبر رساں ادارے 'یو این بی' کے مطابق دارالحکومت ڈھاکہ کے حضرت شاہ جلال انٹرنیشنل ایئرپورٹ کے ایگزیکٹو ڈائریکٹر نے ہوائی اڈے کی بندش کی تصدیق کی ہے۔

'یو این بی' کے مطابق حکام نے تاحال ہوائی اڈے کی بندش کی وجوہات اور آپریشنز کی دوبارہ بحالی سے متعلق کچھ ہیں بتایا ہے۔